WANAFUNZI RUANGWA WAIBUKA KIDEDEA USAFI NA UNADHIFU UMISSETA 2025 MKOA WA LINDI

Posted on: June 1st, 2025

Wanafunzi wa Wilaya ya Ruangwa wameibuka washindi wa usafi na unadhifu katika mashindano ya Umoja wa Michezo kwa Shule za Sekondari Tanzania (UMISSETA) 2025 ngazi ya Mkoa wa Lindi. Tuzo hiyo imetolewa Juni 1, 2025, katika hafla ya kufunga mashindano hayo iliyofanyika Uwanja wa Ilulu, mjini Lindi.

Katika hafla hiyo, mgeni rasmi ameendelea kuwa Kaimu Katibu Tawala wa Mkoa wa Lindi, ambaye pia ni Afisa Elimu Sekondari wa Halmashauri ya Wilaya ya Mtama, Mwl. Mwinjuma Muumini. Amepongeza wanafunzi wa Ruangwa kwa nidhamu na mwonekano mzuri uliowavutia waamuzi na wageni mbalimbali waliokuwa wakifuatilia mashindano hayo.

Aidha, Mwl. Muumini amehimiza wanafunzi kuendeleza tabia hiyo hata wanaporejea mashuleni kwao, akisisitiza kuwa usafi ni sehemu ya malezi bora na unachangia maendeleo ya kitaaluma na kiafya. Amesema kuwa zawadi hiyo ni ushahidi wa kazi nzuri inayofanywa na walimu katika kuwaongoza wanafunzi kitaaluma na kimaadili.

Vilevile, viongozi wa elimu kutoka wilaya mbalimbali wamepongeza Ruangwa na kuahidi kuimarisha usafi kwenye makambi ya wanafunzi katika mashindano yajayo. Wameeleza kuwa usafi unapaswa kuwa kigezo cha kudumu katika mashindano yote ya wanafunzi.

Kwa upande wao, wanafunzi wa Ruangwa wameeleza furaha yao na kuahidi kuwa mabalozi wa usafi na unadhifu mashuleni na kwenye jamii zao, huku wakishukuru walimu wao kwa malezi na usimamizi mzuri wakati wote wa mashindano.