Dawa za Minyoo Tumbo na Kichocho kuanza kugaiwa Mei 2 Ruangwa

Posted on: April 24th, 2019

Halmashauri ya Wilaya ya Ruangwa kupiti Idara ya Afya itaendesha zoezi la utoaji wa dawa za tiba na kinga kwa magonjwa ya Minyoo tumbo na Kichocho kwa watoto walioko shule za msingi zilizopo katika Halmashauri hiyo.

Akitoa taarifa mbele ya kamati ya Afya ya Msingi ya Wilaya katika kikoa kilichofanyika Ofisi ya Mkuu wa Wilaya ,Mratibu wa Magonjwa yasiyopewa kipaumbele Paschal Thobias Lutubija amewaambia wajumbe kuwa  zoezi la utoaji wa dawa hizo litafanyika kuanzia tarehe 2-3 mwezi Mei mwaka huu ,hivyo amewataka wajumbe kutoa hamasa  kwa jamii ili kuweza kufanikisha zoezi hili.

Kwa upande wake Kamanda wa Taasisi ya Kupambana ns Kuzuia Rushwa  Wilaya ya Ruangwa  Bwana James Mwakambonja ameitaka Idara ya Afya ambayo itaratibu zoezi hilo kufanya kazi kwa uadilifu ili kazi iliyokusudia ifanyike na kuonyesha thamani ya fedha ambayo itafanana na kazi iliyofanyika.

Pia amewaonya  watendaji ambao wamekuwa na tabia za ujanjaujanja wa kufanya matumizi ya fedha nje ya shughuli zilizokusudiwa na mradi husika, amesema  taasisi yake haitasita kuchukua hatua kwa watendaji wa Idara watakao kwenda kinyume katika matumizi ya fedha hizo.

Naye Daktari Bakari Nampeha  aliwaomba wazazi na wanafunzi wanaotarajiwa kupata dawa hizi wazione dawa hizi ni sawa na zile zinazotolewa kila siku katika vituo vya kutolea huduma  za afya kwamba hazina tofauti kabisa na hazina madhara kwa binadamu.

Katibu Tawala wa wilaya ya Ruangwa Twaha Mpembenwe ambaye alikuwa mwenyekiti wa kikao akimwakilisha Mkuu wa Wilaya alisisitiza utoaji wa taarifa  katika ofisi yake ili aweze kufanya tathimini juu ya zoezi hili

Pia amewata kuwa waadilifu katika utendaji kazi wao na kuwakumbusha kuwa wanafunzi ndiyo taifa la kesho na ili mwanafunzi aweze kusoma vyema anapaswa awe na afya bora hakikisheni zoezi hili linamfikia kila mlengwa.

MWISHO