Ruangwa yapokea Mil 940 za Ujenzi wa Shule za sekondari.

Posted on: December 8th, 2021

Halmashauri ya Wilaya ya Ruangwa imepokea kiasi cha  shillingi millioni 940 kwa ajili ya Ujenzi shule za sekondari Mbwemkuru na Nanganga.

Hayo yamesemwa na  Mkurugenzi Mtendaji wa Halmshauri ya Wilaya hiyo Ndg Frank Chonya wakati wa mahafali ya kidato cha nne yashule ya sekondari Kassim Majaliwa yaliyofanyika leo (08.12.2021) shuleni hapo.

"Katika fedha hizo kila shule imetengewa shilingi 470 na ujenzi utaanza mara moja baada ya taratibu zote kukamilika" Amesema Chonya.

Kupitia mahafali hayo Mkurugenzi Chonya amewaahidi wahitimu wote watakaopata daraja la kwanza kwa  alama 7 hadi 9 gharama zao za masomo ya kidato cha tano na sita zitalipwa na Halmashauri ya Wilaya ya Ruangwa.

"Yoyote atakayefaulu kwa ufaulu huo asiwe na wasiwasi kwani ataenda kidato cha tano bila wasiwasi kwa sababu gharama zote za kujiunga na ngazi hiyo tutazitoa sisi Halmashauri ya Wilaya" Amesisitiza Chonya.

Katika Mahafali hayo Diwani wa kata ya Nachingwea Mhe. Mahmoud Sadiki amewaasa wahitimu hao watulie na kusubiri matokeo  badala ya kuzurula.

"Kuna wahitimu mmeanza tabia mbaya hivyo naomba muache tabia hizo kwa sababu nyie bado hamjamaliza subirini matokeo muendelee na masomo" Amesema Mhe. Sadiki.

Mhe. Sadiki ametoa rai kwa wazazi kuachana na mipango ya kuwaozesha wahitimu hao ambapo badala yake amewashauri kuanza kuweka fedha zitakazosaidia kuwasomesha watoto wao baada ya kufaulu kujiunga na kidato cha tano.

Katika hatua nyingine, Halmashauri ya Wilaya ya Ruangwa inatarajia kuanza kutekeleza ujenzi wa Kituo cha Afya cha kata ya Namichiga ambacho kitajengwa kwa thamani ya shilingi milioni 400, fedha za mapato ya ndani ya mwaka 2021/2022 zilizokusanywa na Halmashauri hiyo.

Ujenzi wa shule hizo na Kituo cha Afya cha Namichiga ni moja ya jitihada za dhati zilizofanywa na Waziri Mkuu wa Jamhuri ya Muungano  Mhe. Kassim Majaliwa ambaye pia ni Mbunge wa jimbo la Ruangwa.

MWISHO.