HALMASHAURI YA WILAYA YA RUANGWA YATUNUKIWA TUZO KWA KUONGOZA KATIKA VIASHIRIA VYA AFYA MKOA WA LINDI

Posted on: May 3rd, 2025

Halmashauri ya Wilaya ya Ruangwa imetunukiwa tuzo maalum kwa kuongoza katika viashiria vya utekelezaji wa huduma za afya kwa kipindi cha Januari hadi Machi 2025, miongoni mwa Halmashauri zote za Mkoa wa Lindi, tuzo hiyo imetolewa leo tarehe 3 Mei 2025 na Mkuu wa Mkoa wa Lindi, Mhe. Zainab Telack, katika kikao cha tathmini ya Kadi ya Utekelezaji wa Afya kilichofanyika wilayani Ruangwa.

Mafanikio haya yanaashiria hatua kubwa zilizopigwa na Halmashauri ya Ruangwa katika utoaji wa huduma bora za afya, ikiwa ni pamoja na huduma za mama na mtoto, matumizi ya mifumo ya kidijitali kama GoTHOMIS, usimamizi wa takwimu, na upatikanaji wa dawa muhimu.

Hali kadhalika, Kadi ya Utekelezaji wa Afya ni nyenzo ya kitaifa inayotumika kila robo mwaka kupima utendaji wa halmashauri kwa kutumia viashiria 42 kutoka katika maeneo 15 ya temati ya afya, ustawi wa jamii, na lishe. Viashiria hivi vinasaidia kutathmini hali ya utoaji wa huduma na ufanisi wa halmashauri.

Aidha, baadhi ya viashiria vya utekelezaji ni pamoja na: uzazi salama na chanjo, matumizi ya mifumo ya kidijitali ya afya (mfano GoTHOMIS), huduma za lishe, elimu ya afya kwa jamii, upimaji wa VVU na huduma za ARV, uwiano wa watumishi wa afya kwa idadi ya watu, pamoja na utoaji wa huduma kwa wakati na kwa ufanisi.

Kwa upande mwingine, mafanikio haya yasingewezekana bila uongozi thabiti na ushirikiano wa karibu kati ya viongozi wa kisiasa na wataalamu wa afya. Vilevile, juhudi za watumishi walioko mstari wa mbele katika vituo vya kutolea huduma zimechangia pakubwa katika kufanikisha utekelezaji wa huduma hizi.

Kwa ujumla, tuzo hii ni uthibitisho wa juhudi za pamoja katika kuboresha huduma za afya wilayani Ruangwa na kuonesha mfano mzuri kwa Halmashauri nyingine za Mkoa wa Lindi.

#RuangwaYetu

#AfyaBora

#TuzoYaUbora

#Lindi