MKUU WA WILAYA YA RUANGWA AONGOZA DUA YA KULIOMBEA TAIFA KIWILAYA

Posted on: April 22nd, 2024

Kuelekea kilele cha Maadhimisho ya miaka 60 ya Muungano wa Tanganyika na Zanzibar wenye kauli mbiu "Tumeshikamana na tumeimarika kwa maendeleo ya Taifa" Mkuu wa Wilaya Mhe. Hassan Ngoma aongoza zoezi la dua ya kuliombea Taifa kiwilaya leo Aprili 22, 2024 katika viwanja vya Wandorwa wilayani Ruangwa ikiongozwa na viongozi wa dini zote.

Aidha Mhe. Ngoma ametoa wito kwa wananchi kuendelea kuliombea Taifa pamoja na viongozi wake katika maeneo mbalimbali

"Mapungufu ni sehemu ya binadamu, viongozi si Malaika hivyo tunapaswa kuendelea kuwaombea kwa Mwenyezi Mungu viongozi wetu awazidishie uadilifu, waongoze nchi yetu kwa haki, wasiwe wabadhilifu na wasiwe viongozi wa kutoa au kupokea rushwa" Amesema Ngoma

Aidha Mhe. Ngoma ameendelea kwa kusema kuwa misingi ya Taifa la Tanzania haipaswi kuchezewa wala kutingishwa kwani Mataifa mengi yanajifunza misingi ya Taifa kupitia Tanzania na ni kutokana na amani, umoja na mshikamano katika nchi hiyo.

" Kwa misingi ya Taifa iliyotengenezwa na waasisi wetu hayati Mwl. Julius Kambarage Nyerere na Sheik Abeid Aman Karume kwa yeyote anayedhani kwamba amani ya Tanzania itatetereka anapaswa kufikiri upya na asilitegemee hilo kwani amani ya Tanzania itadumu milele"

Katika hatua nyingine mwakilishi wa Mwenyekiti wa Halmashauri ambaye pia ni Diwani wa Kata ya Nachingwea Mheshimiwa Mahmoud Sadick ameishukuru Serikali ya awamu ya sita ya Jamhuri ya Muungano wa Tanzania inayoongozwa na Rais Mhe. Dkt. Samia Suluhu Hassan kwa kuifanyia mambo makubwa Halmashauri ya Wilaya ya Ruangwa.