MAFUNZO YA UBORESHAJI WA DAFTARI LA WAPIGA KURA YATAMATIKA RUANGWA

Posted on: January 22nd, 2025

Afisa Mwandikishaji Jimbo la Ruangwa, Ndugu Frank Fabian Chonya, amefunga rasmi mafunzo ya Uboreshaji wa Daftari la Kudumu la Wapiga Kura kwa Maafisa Waandikishaji Wasaidizi ngazi ya Kata leo Januari 22, 2025, mafunzo hayo yanalenga kuimarisha maandalizi ya utekelezaji wa zoezi hilo.

Akizungumza wakati wa kufunga mafunzo hayo, Ndugu Chonya anatoa wito kwa Maafisa Waandikishaji Wasaidizi kuendelea kupitia na kusoma maelekezo waliyopewa ili kuhakikisha uelewa wa majukumu yao unaimarika zaidi.

“Mafunzo na maelekezo mliyopewa ni zana muhimu za kufanikisha majukumu yenu, hivyo mnatakiwa kuyafuatilia kwa makini ili kuhakikisha ufanisi wa zoezi hili,” amesema Ndugu Chonya.

Aidha, Ndugu Chonya pia amehimiza ushirikiano wa karibu kati ya Maafisa Waandikishaji na Tume, akibainisha kuwa masuala yoyote ya kiutekelezaji yanapaswa kufafanuliwa ipasavyo kwa kushirikiana na Tume.

“Tume imetekeleza jukumu lake kupitia hatua ya mafunzo, na sasa ni wajibu wenu kuhakikisha utekelezaji wa majukumu yenu unafanyika kikamilifu,” amesisitiza Ndugu Chonya.

Hata hivyo, Mafunzo hayo ni sehemu ya maandalizi ya kuhakikisha kuwa zoezi la Uboreshaji wa Daftari la Kudumu la Wapiga Kura linakamilika kwa ufanisi na kwa mujibu wa taratibu zilizowekwa na Tume.

Wadau mbalimbali wanahimizwa kushirikiana kuhakikisha kuwa hatua hiyo inaleta mafanikio makubwa kwa maendeleo ya kidemokrasia katika Wilaya ya Ruangwa.