AFISA MAENDELEO YA JAMII AONGOZA MAFUNZO YA KUMKOMBOA MWANAMKE KATA YA MANDAWA

Posted on: June 29th, 2024

Afisa Maendeleo ya Jamii Wilaya ya Ruangwa Ndugu Rashidi Namkulala aongoza mafunzo ya kumkomboa mwanamke katika sekta ya kiuchumi na kushiriki katika nafasi za uongozi na kusema kuwa kwenye ukombozi wa mwanamke katika sekta yoyote mwanaume hawezi kusahaulika.

Ameyasema hayo leo Juni 29, 2024 katika Kikao cha Mafunzo cha kuwajengea wanawake uwezo kiuchumi na uongozi kilichofanyika shule ya msingi Mandawa wilayani Ruangwa.

Aidha, Kikao hicho kilihusisha majadiliano ya namna gani mwanamke atakombolewa katika sekta ya uchumi na kuwania nafasi mbalimbali za uongozi.

Kwa upande wao wanaume ambao walishiriki kikao hicho walitoa maoni yao kuhusu changamoto wanayoipata baada ya kuwawezesha wanawake ni kwamba wanawake wakiwezeshwa wanaanza kuwa jeuri na wanakuwa hawatawaliki tena.

Nao, wanawake kwa upande wao walitoa maoni yao ya kwamba wanaume hawawaruhusu wanawake hao kushiriki katika shughuli mbalimbali za maendeleo na kuwania nafasi za uongozi kwa sababu ya wivu wa kimapenzi

Katika hatua nyingine, wanaume na wanawake hao wamefikia muafaka wa kukubaliana ya kwamba katika familia ili maendeleo yapatikane pande zote kikubwa ni uwazi, uaminifu, imani na uvumilivu.