Wilaya ya Ruangwa imeendelea kuimarika kiuchumi kupitia maendeleo ya sekta ya viwanda na biashara. Kupitia sera bora za uwekezaji, usimamizi wa rasilimali asilia, na ushirikiano kati ya sekta ya umma na binafsi, Ruangwa sasa ni miongoni mwa maeneo yanayochipukia kwa kasi katika ukuaji wa uchumi wa viwanda na ujasiriamali.
Maendeleo ya Viwanda
Madini ya Graphite
Wilaya ya Ruangwa imebarikiwa kuwa na madini ya graphite, mojawapo ya rasilimali adimu duniani. Uwepo wa migodi kama Namungo, Lindi Jumbo, na Kudu Graphite umekuwa kichocheo kikubwa cha uchumi wa ndani, chanzo cha ajira kwa vijana, pamoja na fursa kwa wawekezaji wa ndani na nje ya nchi. Sekta hii inaendelea kuimarishwa kwa kusimamiwa chini ya sheria na sera za madini nchini.
Biashara ya Hewa Ukaa (Carbon Credits)
Ruangwa imeingia makubaliano na Kampuni ya Carbon First Tanzania Ltd kwa ajili ya kuanzisha biashara ya hewa ukaa kupitia uhifadhi wa misitu ya vijiji. Mradi huu unalenga kukabiliana na mabadiliko ya tabianchi, huku ukiwa chanzo mbadala cha mapato kwa Halmashauri na jamii inayozunguka.
Sekta ya Biashara na Ujasiriamali
Uwezeshaji kwa Wajasiriamali
Kupitia mapato ya ndani, Halmashauri ya Wilaya ya Ruangwa imeendelea kutoa mikopo kwa vikundi vya wanawake, vijana na watu wenye ulemavu. Katika mwaka wa fedha 2024/2025, jumla ya shilingi milioni 565 zilitolewa kwa vikundi mbalimbali vya wajasiriamali, kwa lengo la kuimarisha biashara ndogondogo, kukuza viwanda vidogo vya usindikaji wa mazao, na kuinua uchumi wa kaya.
Maendeleo ya Biashara Ndogo na za Kati (SMEs)
Idara ya Viwanda, Biashara na Uwekezaji inaendelea kuratibu na kutoa msaada wa kitaalamu kwa wafanyabiashara wadogo na wa kati kwa lengo la kuongeza tija na ushindani wa bidhaa zao katika soko la ndani na nje ya nchi. Pia, Halmashauri inaendeleza juhudi za kuanzisha masoko ya kisasa ili kurahisisha shughuli za biashara na usambazaji wa bidhaa.
Fursa za Uwekezaji
Wilaya ya Ruangwa inatoa mazingira rafiki kwa uwekezaji katika maeneo yafuatayo:
•Kilimo cha mazao ya biashara kama korosho, ufuta, mbaazi, mahindi na mihogo.
•Sekta ya madini – hasa uchimbaji wa graphite.
•Uanzishaji wa viwanda vya usindikaji wa mazao ya kilimo.
•Biashara ya huduma, ikijumuisha malazi, utalii wa kiutamaduni na kihistoria, pamoja na sekta ya afya.
•Ujenzi wa masoko na maghala ya kisasa kwa ajili ya kuhifadhi na kusambaza bidhaa za kilimo na viwandani.
Mazingira Rafiki kwa Uwekezaji
Halmashauri ya Wilaya ya Ruangwa inaendelea kuboresha mazingira ya uwekezaji kwa kufanya yafuatayo:
•Kutoa vibali vya uwekezaji kwa haraka kwa wawekezaji halali.
•Kushirikiana na taasisi za kifedha na wadau wa maendeleo kuwezesha uwekezaji.
•Kuwekeza katika miundombinu bora ya barabara, umeme, na maji katika maeneo ya kimkakati ya uwekezaji.
Hitimisho
Sekta ya viwanda na biashara ni injini muhimu ya maendeleo ya kiuchumi wilayani Ruangwa. Kupitia rasilimali zilizopo, sera za uwekezaji, na mikakati ya maendeleo endelevu, Halmashauri inaendelea kuhamasisha uwekezaji na kuwawezesha wananchi kushiriki kikamilifu katika kujenga uchumi wa viwanda unaojali mazingira na ustawi wa jamii.
